Doen jou deel
In my vorige
plasing, Bondgenoot van die Almagtige, het ek vertel hoe God sy deel van die
Nuwe Verbond nakom. Nou is dit tyd om te kyk wat ons moet doen om ons deel van
die verbond na te kom. Aangesien baie van my vorige plasings verband hou met
die punte wat ek uitlig, het ek ook skakels na daardie spesifieke plasings
ingevoeg.
So, wat staan ons
te doen as bondgenote van die Almagtige? Wat maak ons anders as die wêreld?
Liefde
Dit is ʼn opdrag
direk uit Jesus se mond: “Julle moet mekaar liefhê.”
En nie sommer net ʼn
opdrag wat ons ligtelik kan opneem nie. Nee, Jesus noem dit ʼn nuwe gebod. Die
grootste gebod. ʼn Wet. Daar was baie wette wat nagekom moes word onder die Ou
Verbond. Onder nie Nuwe Verbond het ons net een wet wat ons moet nakom en dit
is liefde (John 13: 34-35, Mark 12:30-31, 1 Cor. 13, Rom. 5:5).
Beywer jou vir
God se koninkryk
“Nee, beywer julle allereers vir die
koninkryk van God en vir die wil van God, dan sal Hy julle ook al hierdie dinge
gee,“ Mat. 6:33
Beywer jou… met
ander woorde daar moet ywer wees in alles wat jy doen vir God. En nie net
wanneer jy lus het nie. Die skrif sê jy moet jou “allereers” beywer. Dit
beteken altyd eerste.
Jy moet dus altyd
eerste, met ywer, vir God leef.
Sinonieme vir die
woord ywer is: vasbeslotenheid, intensiteit, volharding, toewyding, passie. Dit
is hoe jy moet voel oor die koninkryk van God.
Gaan verkondig
In Mat. 28:19 gee
Jesus aan ons die opdrag: “Gaan dan na al
die nasies toe en maak die mense my dissipels: doop hulle in die Naam van die
Vader en die Seun en die Heilige Gees”
Dink ʼn bietjie
hieroor… as die dissipels nie hierdie opdrag uitgevoer het nie, sou ons heel
moontlik nie vandag geweet het van Jesus nie…
Nie meer jy
nie, maar Christus
Dis reg ja, jy
lewe nie meer nie. Jy is dood. Die nuwe
jy lewe nou deur Christus.
“Iemand wat aan Christus behoort, is ʼn nuwe
mens. Die oue is verby, die nuwe het gekom.” 2 Cor. 5:17
“want julle het gesterwe, en julle lewe is
saam met Christus verborge in God.” Col. 3:3
Jy word weer
gebore die dag as jy die keuse maak om vir Jesus Christus as jou Verlosser aan
te neem (John 1:12-13, John 3:3, 1 Pet. 1:23).
Daarom moet jy, as
teken van jou wedergeboorte en in gehoorsaamheid aan Jesus, jouself laat doop
(Rom. 6:3-4, Mark 16:16, Mat. 28:19).
Dan moet jou
gedagtes nuut word en moet jy lewe soos ʼn nuwe mens (Rom. 6:11, 1 Peter 1:
14-15, Rom. 12:2, Gal. 2:20).
Dra vrugte
Jesus het gesê: “My Vader word juis daardeur verheerlik dat
julle baie vrugte dra en my dissipels is.” John 15:8
As nuwe mens, wat
God se koninkryk altyd eerste plaas, moet jy ʼn vrugbare lewe lei tot die
verheerliking van God. Sien jou woorde en dade soos sade wat in mense se harte
geplant word. Sade wat gaan ontkiem en groei en ʼn oes gaan oplewer (Gal.
6:7-10, Luke 10:2, Ps. 126:6, Mark 4:29, 2 Cor. 9:10)
Bou aan jou
verhouding met God
Iemand het eenkeer
gesê: “Instead of saying: ‘I don’t have
time’ try saying: ‘It’s not a priority’ and see how that feels”
Ons moet tyd maak
vir God. Tyd maak vir bid, Bybelstudie en vir prys en aanbidding.
Ons tyd saam met
God is die spil waarom alles draai. Dit is daar waar jy God ontmoet, waar die
Gees jou leer en toerus, waar jy groei in jou geloof en waar jy rus vind vir
jou siel (James 4:8, Heb. 4:16, Mat. 18:20, John 14:23, Phil 4:6-7)
Lewe deur die
Gees
God se genade en
liefde vir ons is so groot dat hy die Heilige Gees gestuur het om ons te help
om ons deel van die verbond na te kom. Al wat ons hoef te doen is om die
werking van die Heilige Gees te aanvaar en toe te laat in ons lewens.
Hy herinner ons aan
Jesus se woorde, gee ons krag om te getuig, gee ons wysheid, rus ons toe vir
ons taak en maak ons dapper (Gal. 5: 13-26, John 14:25-26, Acts 1:8, Acts 6:10,
1 Cor. 2:13, 2 Cor. 3:5-6, 2 Tim 1:7)
Hy help ons bid en
gee aan ons gawes waarmee die Kerk van Christus opgebou en versterk word. (Rom.
8: 26, Rom. 12:6, 1 Cor. 12:28-31).
Mag jy elke dag in verbondenheid met Hom lewe, in Hom gewortel en op Hom gebou. Standvastig in jou geloof en vol dankbaarheid.
Dit is my gebed vir jou.
Liefde in Jesus
Madeleine
Alle aanhalings kom uit die Bybel in Afrikaans 1983-vertaling. Bybelgenootskap van Suid-Afrika
All images: Pixabay
Alle aanhalings kom uit die Bybel in Afrikaans 1983-vertaling. Bybelgenootskap van Suid-Afrika
All images: Pixabay
