Bangmaakwoorde
Mat. 7:21-23 is ʼn gedeelte in die Bybel wat baie Christene ongemaklik
laat voel. Hoe is dit dan nou dat nie almal wat in Jesus se Naam profeteer,
duiwels uitdryf en wonders doen eendag in die koninkryk van die hemel gaan kom
nie? Veral vers 23 maak ʼn mens bekommerd: “Dan gaan ek openlik vir hulle sê: Ek het
julle nooit geken nie. Gaan weg van My af, julle wat die wet van God oortree.”
Sjoe! Dis woorde wat ek beslis nie eendag wil hoor nie.
Wat beteken hierdie stuk? Hoe kan ek seker maak ek hoor nie eendag daardie
woorde nie?
Is dit dan verkeerd om in Jesus se Naam te profeteer, duiwels uit te dryf
en wonders te doen? Nee, beslis nie! Jesus gee ons die opdrag en die outoriteit om
dit te doen (Mat. 10:1,8, Mark. 16:17).
Konserwatiewe gereformeerdes is lief daarvoor om hierdie stukkie aan te
haal as hulle charismatiese Christene wil kritiseer. Veral die duiwels uitdryf
en wonders doen gedeelte. Hierdie stukkie het egter niks te doen met
denominasie nie. As jy hierdie gedeelte in konteks lees sal jy sien dat Jesus
so pas Sy aanhoorders teen vals profete gewaarsku het in Mat. 7:15-20. Dit is
dus die vals profete wat Jesus so pas genoem het waarna Hy ook verwys in Mat
7:21-23.
Sleutelwoorde
Daar is twee sleutelwoorde wat baie belangrik is as ons hierdie gedeelte reg wil verstaan en dit is die woorde “wil” en “wet”. Vals profete doen
nie Sy wil nie en steur hulle nie aan Sy wet nie. Hulle intensies is selfgesentreerd.
Dit is wat hulle vals maak. Hulle behoort nie regtig aan Jesus nie, so Hy ken
hulle ook nie as vriende nie.
Die eerste sleutelwoord kry ons in Mat. 7:21 (eie klem): “Nie elkeen wat
vir My sê: ‘Here, Here,’ sal in die koninkryk van die hemel ingaan nie, maar
net hy wat die wil doen van my Vader wat in die hemel is.”
Wat is die wil van die Vader?
Die tweede sleutelwoord staan in Mat. 7:23b (eie klem): “Gaan weg van My
af, julle wat die wet van God oortree.” Die Ou vertaling sê “...julle wat die
ongeregtigheid werk” en die NKJV “...you who practice lawlessness”. Hy praat
dus hier met mense wie se werke wetteloos is.
Wat is die wet van God?
Dit kom alles neer op liefde
Die wil van die Vader en die wet van God kan opgesom word in een
woord en dit is die woord Liefde.
In die gedeelte oor die vals profete, gee Jesus ons ʼn manier om hulle uit
te ken (Mat. 7:16). Hy sê ons moet kyk na watter vrugte ons in hulle lewens sien.
Die vrug van die Gees of die vrug van die vlees? (Gal. 5:19-22) ʼn Vals profeet
dra nie die vrug van die Gees nie. Liefde, vreugde, vrede, geduld,
vriendelikheid, goedhartigheid, getrouheid, nederigheid en selfbeheersing.
Vergelyk gerus hierdie eienskappe met Paulus se beskrywing van liefde in 1 Kor.
13 en jy sal sien dat dit alles kenmerke van liefde is.
Paulus maak ook die volgende stelling oor die vrug van die Gees: “Teen
sulke dinge het die wet niks nie.” (Gal. 5:23b) Hoekom nie? Want, die wet van
God kom ook neer op liefde. Toe Jesus gevra is watter wet die belangrikste van
almal is, het Hy geantwoord: “Jy moet die Here jou God liefhê met jou hele hart
en met jou hele siel en met jou hele verstand en met al jou krag.’ Die tweede
is: ‘Jy moet jou naaste liefhê soos jouself.’ Geen ander gebod is groter as dié
twee nie.” (Mark. 12:30-31.)
Aangesien dit God self is wat hierdie stelling gemaak het, kan ons met
sekerheid sê dat dit die wil van God is dat ons Sy wet van
liefde moet nakom. Liefde vir God en liefde vir mense.
Jesus se hele lewe was liefde tot die dood toe. ʼn Diensbare, onselfsugtige
liefde. Hy het gesê: “Ek gee julle ʼn nuwe gebod: julle moet mekaar liefhê. Soos
Ek julle liefhet, moet julle mekaar ook liefhê.” (Joh. 13:34) En ook “Dit
beveel Ek julle: Julle moet mekaar liefhê!” (Joh. 15:17) Dit is ʼn bevel, ʼn gebod,
ʼn wet. God se wet.
Die liefdelose
So wie is dit dan wat eendag gaan hoor: “Gaan weg van my af”? Dit is diegene
wat profeteer, duiwels uitdryf en wonders doen, in Jesus se naam, sonder
liefde vir God en mense. Hulle gebruik die outoriteit van sy Naam
sonder liefde. Sy Naam word daardeur oneer aangedoen. Dit is ʼn sonde so groot
dat Hy hulle nie wil ken nie. Hy kan hom nie met hulle vereenselwig nie, want
Hy is liefde.
“God is liefde; wie in die liefde
bly, bly in God en God bly in hom.” (1Joh. 4:16b) Jy kan nie jouself ʼn Christen
noem as jy nie liefhet nie. Lees gerus die hele 1 Johannes.
Laat alles by jou dus in liefde geskied. Alles.
Dit is wat jou ʼn volgeling van Christus maak.
Wees geseënd
Madeleine
©Alle aanhalings in hierdie
plasing kom uit die Bybel in Afrikaans 1983-vertaling. Bybelgenootskap van
Suid-Afrika tensy anders aangedui
All images: Pixabay
