'n Uitdaging

Ja, daar is slegte nuus.

Ek het nie nodig om jou in te lig nie. Lees die koerante…

Groot ekonomiese probleme. Moordenaars. Terroriste. Bedrieërs. Onregverdige besluite. Bespotting. Afpersing.

Wag, ek weet jy wil sommer nou ophou lees. Maar hierdie is nie ʼn “O! Help ons tog! Wat gaan van ons word?” blog nie. Nee, ek wil jou uitdaag om anders, as die mense om jou, na alles te kyk…

Jy sien, die meeste mense kyk na die wêreld sonder God. Dit is wanneer jy moedeloos word.

Gaan lees ʼn bietjie die verhaal van Nehemia in die Bybel. Hy het ook slegte nuus gehoor. Nuus wat hom so ontstel het, dat hy vir vier maande daaroor getreur het. Maar hy het nie net getreur nie, hy het gebid ook en terselfdertyd begin planne maak om die situasie om te keer. Sodat, toe die geleentheid oor sy pad kom, hy gereed was om aksie te neem. Onder sy strategiese leierskap is daar begin om die mure van Jerusalem te herbou. Dit was glad nie ʼn maklike taak nie, want, raai waarmee moes hulle alles opgeskeep sit? Bespotting, terroriste en bedrieërs. En, asof dit nie genoeg was nie, is Nehemia gedurig afgepers en geïntimideer. Maar, hy het nie toegelaat dat enige iets hom van sy Goddelike taak laat afsien nie en binne twee maande, in die somerhitte van Israel, is die mure herbou. Nou moes selfs Israel se vyande in verbasing hulle koppe skud en erken dat God met Nehemia was. Nehemia het dit natuurlik lankal geweet. Dit is waarom hy in die eerste plek die moed gehad het om hierdie taak aan te pak. Vir ander het dit soos ʼn onmoontlike situasie gelyk. Maar as jy saam met God na slegte nuus kyk, raak jy nie moedeloos soos die mense om jou nie.

Daar is ʼn plan. ʼn Goddelike plan waarvan ons deel is. Daar is ook ʼn Koninkryk. ʼn Koningryk waarvan jy deel word as jy weer gebore word in die Gees. Die Bybel is so vol van beloftes vir hierdie Koningryk-kinders van God dat as jy dit lees, jy vinnig besef jy bevind jou hier in ʼn ander plek as die plek waarin die wêreld leef.

As jy in hierdie Koningryk leef, beweeg jy op alle gebiede net hoopvol vorentoe.

Maar, as jy nie die beloftes ken nie, of dit nog nooit gelees het nie, gaan jy nie daarvan weet nie en gaan jy moedeloos raak saam met almal wat nie Koninkryk-kinders is nie.

Gilbert Beeken het gesê: “Ander verwag ʼn hopelose einde. Maar die wat in God glo, het eindelose hoop.”

Nou is ek weer by die uitdaging. Gaan soek ʼn bietjie ʼn paar beloftes uit die Bybel en bêre dit in jou hart. Kyk dan saam met God na die wêreld en wees sout en lig. Wees Jesus se hande en voete. Gee hoop aan moedelose mense.

Slegte nuus is niks nuuts nie. Dit is so oud soos die sondeval. Maar deur die eeue heen was daar altyd nog die mense wat hulle nie deur slegte nuus laat stop het nie. Soos Joshua en Kaleb wat God se beloftes geken en geglo het. Die mense wat moedeloos geraak het oor die slegte nuus, is die beloofde land kwyt. Maar Joshua en Kaleb het dit binne gegaan.


Hou vas aan die beloftes uit die Woord. Moenie moedeloos raak nie. Nou-nou mis jy ook jou beloofde land.

Volg my op Facebook

Volg my op Facebook

Kontakvorm

Naam

E-pos *

Boodskap *

Gewilde plasings van hierdie blog

'n Brief aan my kind

Prent
My liewe kind… ʼn Nuwe emosie het in my wakker geword, die eerste keer wat ek jou hartjie hoor klop het. Dit is ʼn emosie wat ek nie voorheen gehad het nie, maar wat saam met jou groter en sterker gegroei het. Nou is dit so deel van my dat ek nie kan onthou hoe my lewe daarsonder was nie. Verwondering. Blydskap. Vrede. Verantwoordelikheid. Vrees. Nederigheid. Verbasing. Alles in een. Ek sou my lewe vir joune ruil. En sal nog steeds. Daardie eerste keer wat ek jou warm asempie teen my wang gevoel het en jou pasgebore velletjie geruik het, sal ek nooit in my lewe vergeet nie. Dit was op daardie oomblik wat die nuwe emosie my hele wese oorgeneem het. Ek weet nou dis hier om te bly. Vir so lank as wat ek lewe! Al die ouerskap boeke, al die toerusting en al die goedbedoelde raad was ewe skielik nie genoeg nie. Jy is jy. Hulle kon nog nie oor jou skryf in enige boek nie, want jy was nog nooit gewees nie. Op die ou end het ons geleer dat ons eie raad die beste raad is, al w
Hou aan lees

Prysuitdeling

Prent
Dit is weer daardie tyd van die jaar. Prysuitdelings. Dit is die tyd waarin ʼn mens vir twee ure op ʼn harde saal stoel sit en wag vir jou kind se naam om uiteindelik gelees te word. Jy is so besig om te wonder waarvoor sy ʼn prys gaan kry, dat jy nie juis luister watter pryse die ander tweehonderd kinders kry nie. As sy dan uiteindelik daar op die verhoog saam met haar klas staan, is jy weer so besig om foto’s te neem, dat jy inelkgeval nie eens mooi hoor wat op die stuk papier staan waaroor sy groot oog staan en loer nie. Maar jou hart swel van trots en jy sug van verligting dat haar naam wel uitgelees is. Ek kan nie help om te wonder waar prysuitdelings begin het nie…hoekom het mense besluit daar moet sertifikate, medaljes, balkies, trofee en allerhande dinge uitgedeel word om te wys hoe oulik iemand is? Wat van die outjie wat nie ʼn medalje kry nie? Of die een wat vol hoop na die trofee staar net om te sien hoe dit aan iemand anders oorhandig word? Die doel van ʼn skool pry
Hou aan lees

'n Brief aan Ma

Prent
Liewe Ma… Om vier kinders te kan groot maak moet ʼn mens hare op jou tande hê. Want elke kind is ʼn klein beginner-mensie. Dis moeilik genoeg om een beginner-mensie in die regte rigting te stuur. Hoe doen ʼn mens dit met vier? So hierdie is ʼn dankie-sê-brief. Dankie vir die Bybel stories en die kerk toe gaan. Dankie vir “Ek is ʼn kindjie klein…” gebedjies en “ons praat nie so nie” vermanings. Dankie vir die kerk kampe en my Bybel. Dankie dat ma dáár was. Elke middag na skool gereed om met huiswerk te help en vir ure te sit en wag by naskoolse aktiwiteite. Dankie dat ons nie nodig gehad het om ooit vermaak op ander plekke as by ons huis te gaan soek nie. Daar was altyd iets om te doen naweke en vakansies. Dankie dat ons buite kon speel en in die ou wilgerboom kon klim. En die siek-dae…hoe baie keer het ek nie, noudat ek self ʼn ma is, gewens Ma kon my kom versorg as ek siek is nie! Dan was daar verjaarsdae en Kersfees. Die spesiaal opgemaakte pakkies met spesiaal uitgeso
Hou aan lees